ନାରୂର୍: ତାମାକିଙ୍ଗ୍ କୋୟାତୋର୍ ଇଞ୍ଜ କେଲ୍ନୋର୍
ୱେରେନାରୂର୍ ଈର୍କିଙ୍ଗ୍ କୋୟା ଇଞ୍ଜ କାର୍ଙ୍ଗାନୋର୍
ଗଟି: କୋୟ୍ତୋର୍ ମାଟା /ଗଟି ଇଞ୍ଜ କେତିତୋର୍
କୋୟା ବାଶା ଇଞ୍ଜ ୱେରେ ନାରୂର୍ କେଲ୍ନୋର୍
ମତ୍ତା ନାରୂର୍: ରେଣ୍ଡୁ ଲେଚୋଙ୍କ୍ ଏକ୍ୱା ନାରୂର୍ , ମାଲ୍କାନ୍କିରିତାଗା କୋୟା ଗଟି ତିରିୟମିନ୍ଦଦେର୍.
ମୋଟୁ ଏରିୟାତା ମାନ୍ଦାନୋର୍ ଦର୍ଲା କୋୟାତୋର୍ ଇଞ୍ଜ କେଲ୍ନୋର୍.
କାଲିମେଲା, ବାଲିମେଲା, ମାତ୍ଲି, ମାଲ୍କାନ୍ଗିରି,ପୋଡ଼ିଆ, ତାଗା ମାନ୍ଦାନୋର୍ ଗତ୍ତି କୋୟାତୋର୍ ଆତୋର୍.
ସାର୍ରେ ନାକିନା ଅଣ୍ଡୟ୍ ଗୁଡ଼ିୟ୍ ମାନ୍ଦା ,ଆଦିଙ୍କ୍ ଗାମାମ୍ ଇଞ୍ଜ କାର୍ଙ୍ଗାନୋର୍. ନାର୍ଦୋର୍ ତାମ୍ ବାଗାୱାନ୍ତିଙ୍କ୍ ମଡ଼୍କାନାଙ୍କ୍ ଇଞ୍ଜ ଇଗେ ଗୂଡ଼ାନୋର୍. ଆ ଦିନାଲ୍ତିଙ୍କ୍ ପାଣ୍ଡୁମ୍ ଇଞ୍ଜ କେତୋର୍.
ଓଶ୍ ପୟ୍ତାନ୍ କାଲ୍ଲ୍
ପାୟ୍ୟାଲ୍ ନାର୍କୋମ୍, ମାଦ୍ନାମ୍ ମୁଲ୍ପୁଟ୍ ଇଞ୍ଜ ଦିନାଲ୍ ମୁଣ୍ଡ୍ ଦାମ୍ ତାଡ଼୍ ମାଡ଼ା କୋଞ୍ଜି ତାଡ଼୍ କାଳ୍ତିଙ୍କ୍ ଡିପିଶ୍ତୋର୍. ଈଡ଼୍/ଈକୀ ପୁଙ୍ଗାର୍ତିଙ୍କ୍ ପେକି ମେଣ୍ଡ୍ ଈଡ଼୍ କାଲ୍ଲ୍ତିଙ୍କ୍ ମାଡ଼ିତୋର୍. ବେବ୍ରୁୱାରି, ମାର୍ଚ୍, ଏପ୍ରାଲ୍ , ଲେଞ୍ଚ୍କିନା ଈ ପୂଙ୍ଗା ଦର୍କମିନ୍ଦେ. ଈ ପୁଙ୍ଗାତିଙ୍କ୍ ପେକି ମେଣ୍ଡ୍ ନାଲୁ, ଆୟ୍ଙ୍କ୍ ଦିନାଲ୍ ଓଡ଼ିସି ୱାତ୍ତିଶ୍ତୋର୍. ଆୱ୍ ପୂଙ୍ଗାର୍ତିଙ୍କ୍ ଆରୁ ଦିନାଲ୍ କୁଣ୍ଡା ତାଗା ୱାଟି ଗାବ୍ ୱାଦିଶ୍ତୋର୍. ଆଦିନ୍ ପେର୍କେ ଏର୍ ତା କାପି ମେଣ୍ଡ୍ ୱାଡ଼ିୟ୍ଶ୍ତୋର୍. ୱାଡ଼୍ୟ୍ତା କାଲ୍ଲ୍ତିନ୍ ନେହ୍ଶ୍ ମେଣ୍ଡ୍ ଉଣ୍ଟୋର୍. ଆଦ୍ କେନ୍ନା ଓଶ୍ ପୟ୍ସି ମାନ୍ତା.
ପେଣ୍ଡୁଲ୍-ପେଲ୍
ୱେର୍ରୋନ୍ ତାନ୍ କାଟାତେ ଇଲୁକ୍ ତାନ୍ ଲୋତା ପିକିଡ଼୍ତିଙ୍କେ ପେଣ୍ଡୁଲ୍ ମାଡ଼ାନାଦ୍ ଆୟ୍ୟୋ. ୱେରେ ଲୋତା ପିକିଡ଼୍ତିଙ୍କେ ପେଣ୍ଡୁଲ୍ ମାଡ଼ା ୱେତିତ୍.
ପେଣ୍ଡୁଲ୍ ପେକାଲ୍ତିଙ୍କ୍ କୋକୋଣ୍ଡ୍ ଇଞ୍ଜ କେଲ୍ନୋର୍. ପେକାଲ୍ ପିକିଡ଼୍ ରାଜି ଆତ୍ତା ପେର୍କେ ଊର୍ ତାମ୍ ବାବାଲ୍ ନୁ ୟାୟୋନ୍ ତୋଡ଼୍ ପିକିଡ଼୍ ଲୋନ୍ ଆଞ୍ଜି ଗଟି ତିରିୟିତୋର୍. ଦାନ୍ ପେର୍କେ ସାର୍ଦାତେ କାଲ୍ଲ୍ ଊଣ୍ଟୋର୍. ପେଣ୍ଡୁଲ୍ ପିକିଡ଼୍ ମାୟ୍ଦିଙ୍କ୍ ପେକାଲ୍ ଲୋତୋର୍ ଆ ପିକିଡିନ୍ ନାର୍ଦୋର୍ ନୁ ସାଗାତୋର୍କିଙ୍କ୍ ଗଡ଼୍କ୍, ମେକା, ପାଦି ଇଞ୍ଜ ଈତୋର୍. ପେର୍କେ ଊର୍ ରୋଜ୍ ତହ୍ତିତୋର୍. ମାର୍ଚ୍ଚ, ଏପ୍ରିଲ୍ ,ମେ, ଲେଞ୍ଚ୍କିନା ପେଣ୍ଡୁଲ୍ ଆତା. ବାତାଙ୍କ୍ ଇତ୍କେ ଆସୁଟ୍ ଊର୍କିଙ୍କ୍ ଆସୋର୍ ବୂମ୍ ପାଡ଼ିୟ୍ ମାନ୍ନୋ.
ପେଲ୍/ପେଣ୍ଡୁଲ୍ ଗଟି ଆତ୍ତା ପେର୍କେ ପିକି ନୁ ପେକାଲ୍ ଲୋତୋର୍ ଦାୟ୍ନାଟେ କାୟ୍ଲି ମେଲିୟି ମାଟା ତିରିୟ ମାନ୍ଦୋର୍. ପେଣ୍ଡୁଲ୍ ରୋଜ୍ତିନ୍ ଆ ନାର୍ ଦା ମାନ୍ଦାନ୍ ୱାଟ୍ଟେ ୱାଲ୍ଲାମ୍ ଊଡ଼ି ତହ୍ତିତୋଣ୍ଡ୍.
Death
ମେଣ୍ଡନ୍ ଦାମ୍ ପୁଟାନ୍ ମାଟାତିଙ୍କ୍ କୋୟାତୋର୍ ୱିଶ୍ୱାସାମ୍ ମାଡ଼ମିନ୍ଦେର୍. ଅକା ୱେଲା ଲୋତା ପୁଟାନ୍ ପିକି ଆୟ୍ ପେକାଳ୍ ତାମ୍ ଦାଦୋ ପେପିର୍ ଲେକେ ପୁଟାନାସୁଙ୍କ୍ ଇଲୁକ୍ ବାତା ଆୟ୍ ଚିନ୍ନି ଆନାୱାଲ୍ ପିଲ୍ଲାନ୍ ମେନ୍ଦୂଲ୍ ତା ମାତ୍କେ ଦାଦୋ ପେପିରେ ମେଣ୍ଡନ୍ ଦାମ୍ ଆଦେ ରୂପାମ୍ ଆସି ପୁଟ୍ତୋର୍ ଇଞ୍ଜ ୱିଶ୍ୱାସାମ୍ କୀତୋର୍. ୱେର୍ରୋଣ୍ଡ୍ ରୋଗାମ୍ ତେ ଇଲୁକ୍ ନୋପିନେ ଡୋଲ୍କେ ମାନ୍ତ୍ରାମ୍ ଆୟ୍ ପୂଜା ତେ କେତିତୋର୍ ଊନ୍କିଙ୍କ୍ ବୁତାମ୍ ପୟ୍ଦିତ୍ ଇଞ୍ଜ .
ବେନୋନ୍ ଆୟ୍ ଡଲ୍କେ ଊନ୍ ପିନୁମ୍ତିନ୍ ମିଚିତୋର୍. ଡଲ୍ତାସିଟେ ଡୋଲା ଏନ୍ଦିତୋର୍. ୱେଦ୍ ନେ ମାର୍ ଆଲ୍ଲି , ଦାନ୍ ପର୍ର ଡଲ୍ତା ନାରୂନିନ୍ ପିନାମ୍ ତିଙ୍କ୍ ୱାଟି ଏତୋରେ ଆରିୟିତୋର୍ . କେୟୋରେ ପାଟା ପାରିତୋର୍. ସାଗାତୋର୍ ୱାସି ପୁନା ପୁନା ସୀଲେତିଙ୍କ୍ ପିନୁମ୍ ପର୍ର ୱାଟିତୋର୍ . ସାଗାତୋର୍ ଜାଟିନୋର୍ ସାର୍ରେ ଦୁକ୍କାମ୍ ତେ କାଲ୍ଲ୍ ଊଞ୍ଜି ଓଶ୍ ତେ ଲୋନ୍ ମାଲ୍ଦିତୋର୍.
